Toshkentda xokkey jamoasi tashkil bo‘larkan degan gapni birinchi marta eshitganimizda barchamiz xursand bo‘lgan edik. Poytaxtimizda xokkey o‘yini uchun jahon andozalariga mos keladigan arena qurilib, bu arenada “Humo” jamoasi o‘zining uy uchrashuvlarini o‘tkazdi. “Humo” jamoasi tufayli 30 yillik tanaffusdan so‘ng O‘zbekistonda xokkey o‘yini yana muxlislarning sevimli sport turiga aylandi.

O‘tgan qisqa muddat ichida “Humo” jamoasi shu qadar ko‘p muxlis to‘pladiki, bu jamoaga barcha futbol jamoalarining ham havasi keladigan bo‘ldi. “Qo‘qon-1912” jamoasi a’zolari ham bu jamoaning ko‘plab uy uchrashuvlariga tashrif buyurib, “Humo”ga muxlislik qilishdi. “Humo” ilk urinishidayoq VXLning yetakchi jamoalaridan biriga aylandi. Jamoa Petrov kubogining chorak finaliga qadar yetib borgani so‘zimizga isbot bo‘la oladi. "Humo" arenadagi yaratilgan sharoitlar, muhit, jamoaning marketing xizmati qanday ishlashi lozimligini barchaga namuna qilib ko‘rsatishga loyiq edi.

Kutilmaganda, barchamiz uchun qadrli bo‘lgan “Humo” jamoasi kelasi mavsum VXLda ishtirok eta olmasligini e’lon qildi. Biz hozirgi sharoitda jamoaning bu qarorini to‘g‘ri tushunamiz. Butun dunyoda koronavirus pandemiyasi tufayli noqulayliklar yuzaga kelmoqda. Ko‘plab aviakompaniyalar faoliyatlarini to‘xtatib turishga majbur bo‘lishmoqda. VXLda o‘ynash uchun esa ko‘plab mamlakatlarga va shaharlarga uchish kerak bo‘ladi.

“Qo‘qon-1912” jamoasi kelgusida “Humo” xokkey klubi yana o‘z faoliyatini davom ettirishiga umid qiladi. Biz sizlarni yana muz arenalariga qaytishingizni yaratgandan so‘rab qolamiz.

Biz seni sog‘inamiz, “Humo”!