AGMKning har oy yakunlariga ko‘ra eng yaxshi futbolchisini muxlislar bergan ovoz orqali aniqlashni odatga aylantirgan.
Mart oyida AGMK Superliga doirasida ikkita o‘yin o‘tkazdi. Jizzaxda "So‘g‘diyona" mehmoni bo‘lgan jamoamiz durang (1:1) qayd etgan bo‘lsa, Olmaliqda "Bunyodkor"ni (2:0) ishonchli tarzda mag‘lub etgandi.
Mazkur o‘yinlarda jonbozlik ko‘rsatgan va faol harakatlari bilan AGMK qo‘lga kiritgan ochkolarda munosib ulush qo‘shgan Igor Zonich (2 o‘yin, 1 gol), Murod Toshmatov (1 o‘yin, 1 gol) hamda har ikkala bahsda zaxiradan o‘yinga qo‘shilib jamoaga naf keltirgan Xojimat Erkinov (2 o‘yin, 1 gol, 1 assist) "Mart oyining eng yaxshi futbolchisi" nomini qo‘lga kiritishda nomzodlar qatoridan o‘rin olishdi. 1 hafta davom etgan so‘rovnomaga ko‘ra, eng ko‘p ovoz o‘tgan oyning ham eng yaxshi futbolchisi nomini qo‘lga kiritgan Xojimat Erkinovga nasib qildi. Shu tariqa Erkinov ketma-ket ikkinchi oy olmaliqlik muxlislar e’tirofiga sazovor bo‘ldi. O‘tgan oy asosan o‘quv-mao‘g‘ulot yig‘ini doirasidagi o‘yinlari orqali e’tirofga loyiq ko‘rilgan Xojimat Erkinov, bu gal dastlab Jizzaxdagi o‘yinda Zonichga golli uzatmani amalga oshirgan bo‘lsa, "Bunyodkor"ga qarshi bellashuvda AGMK safida debyut golini urib, seriyani ochib olishga muvaffaq bo‘ldi.
Xojimat Erkinov so‘rovnomada 64% ovoz to‘plab g‘olib chiqdi.
Kelgusi o‘yinlarda ham Xojimat Erkinov va jamoamizning qolgan barcha a’zolaridan doimiy faollik va jonbozlikni kutib qolamiz.
Hozircha esa uyda qoling va karantin qoidalariga rioya qiling!
