АГМКнинг ҳар ой якунларига кўра энг яхши футболчисини мухлислар берган овоз орқали аниқлашни одатга айлантирган.

Март ойида АГМК Суперлига доирасида иккита ўйин ўтказди. Жиззахда "Сўғдиёна" меҳмони бўлган жамоамиз дуранг (1:1) қайд этган бўлса, Олмалиқда "Бунёдкор"ни (2:0) ишончли тарзда мағлуб этганди.

Мазкур ўйинларда жонбозлик кўрсатган ва фаол ҳаракатлари билан АГМК қўлга киритган очколарда муносиб улуш қўшган Игорь Зонич (2 ўйин, 1 гол), Мурод Тошматов (1 ўйин, 1 гол) ҳамда ҳар иккала баҳсда захирадан ўйинга қўшилиб жамоага наф келтирган Хожимат Эркинов (2 ўйин, 1 гол, 1 ассист) "Март ойининг энг яхши футболчиси" номини қўлга киритишда номзодлар қаторидан ўрин олишди. 1 ҳафта давом этган сўровномага кўра, энг кўп овоз ўтган ойнинг ҳам энг яхши футболчиси номини қўлга киритган Хожимат Эркиновга насиб қилди. Шу тариқа Эркинов кетма-кет иккинчи ой олмалиқлик мухлислар эътирофига сазовор бўлди. Ўтган ой асосан ўқув-маўғулот йиғини доирасидаги ўйинлари орқали эътирофга лойиқ кўрилган Хожимат Эркинов, бу гал дастлаб Жиззахдаги ўйинда Зоничга голли узатмани амалга оширган бўлса, "Бунёдкор"га қарши беллашувда АГМК сафида дебют голини уриб, серияни очиб олишга муваффақ бўлди.

Хожимат Эркинов сўровномада 64% овоз тўплаб ғолиб чиқди.

Келгуси ўйинларда ҳам Хожимат Эркинов ва жамоамизнинг қолган барча аъзоларидан доимий фаоллик ва жонбозликни кутиб қоламиз.

Ҳозирча эса уйда қолинг ва карантин қоидаларига риоя қилинг!