O‘tgan mavsum Vadim Abramov boshchiligidagi murabbiylar shtabida faoliyat yuritgan Yorqin Nazarov bu yildan «Bunyodkor-2»ning bosh murabbiyiga aylanganidan xabaringiz bor. Biz yosh mutaxassisning fikrlari bilan qiziqdik.

- Futbolchilik faoliyatimda ham bunday holat bilan to‘qnash kelmagandim. Ya’ni, chempionat boshlanishi arafasida ixtiyorsiz ravishda majburiy ta’tilga chiqish. Yaxshi tomoni shundaki, murabbiy sifatida vaziyatdan chiqishga harakat qilaman, bunday holatlarda nimalar qilish kerakligini o‘rganaman. Aniqrog‘i, majburiy ta’tildan foydalanib, o‘z ustimda ishlayapman, ko‘p kitoblar o‘qiyapman. Qanday qilsa bu vaziyatdan oson chiqiladi, futbolchilarni masofaviy holatda mavsumga tayyorlashning yo‘llarini o‘rganyapman.

Hozir futbolchilar jismoniy holatni bir maromda ushlab turish uchun o‘z uyida mashg‘ulot o‘tkazmoqda. Tez orada ijtimoiy tarmoqdagi guruhimizda yigitlarga nazariy mashg‘ulotlar o‘tishni boshlayman. Shogirdlarimga nazariy mashg‘ulotlarni o‘tib, nimani xohlayotganimni to‘liq tushuntirib bera olsam, mavsum davomida qiyinchilikka duch kelmayman, deb o‘ylayman. Jismoniy holat? Murabbiylar shtabida jismoniy tayyorgarlik bo‘yicha professional yordamchim bor. Uni o‘z dasturi va yetarlicha tajribasi bor. O‘ylaymanki, futbolchilarning jismoniy holati bo‘yicha jamoada muammo bo‘lmaydi.

O‘zbekiston birinchiligi qaysi formatda o‘tishini xohlayman? Rosti, buni hozircha o‘ylab ko‘rganim yo‘q. Faqat PFL qaysi formatni tanlasa ham jiddiy tahlil qilishi kerak. Karantin qachon yakunlanishi noma’lum. Qolaversa, hali mashg‘ulot o‘tkazishga ham ruxsat berilmadi. Tabiiyki, uyog‘iga vaqt kam bo‘ladi. O‘z-o‘zidan bu yerda klublarga og‘irlik qilmaydigan format tanlash kerakligi ma’lum.

Karantin davrida xalqimga sabr-toqat tilayman. Barchadan hukumatimiz qo‘ygan talablarga qat’iy rioya qilishini so‘rab qolaman. Shunda biz birgalikda virusni yengamiz!