«Manchester Yunayted» klubi sobiq himoyachisi Rio Ferdinand «Yuventus» hujumchisi Krishtianu Ronaldu haqida o‘z fikrini bildirib o‘tdi. Ushbu futbolchilar birgalikda "MYU" safida faoliyat yuritishgan.

«Biz unda iqtidor borligini bilardik, ammo uning mentaliteti o‘zgacha edi. Uning dunyoqarashi bilan ajralib turardi. Uning ambisiyasi juda yuqori edi. Ronaldu so‘nggi daqiqada «Fulxem» darvozasiga g‘alaba golini urishdan qoniqish hosil qilmasdi. U bu ishni Chempionlar ligasi finali yoki Portugaliya safida jahon va Yevropa chempionati finalida amalga oshirishni istardi.

U mo‘ljalni juda yuqori oldi. Hattoki, bugungi kunda ham u bilan gaplashsam, Krishtianu nimadandir qoniqish hosil qilmagan bo‘ladi. U yuksak natijalarga erishdi, ammo odamlar u haqida nima deb gapirishayotganidan xavotir oladi. Ronaldu qoniqish hosil qiladigan marra mavjud emas. Aynan shuning uchun Krishtianu, bizdan farqli ravishda, bugungi natijasiga erishgan», — dedi Ferdinand.