Koronavirus pandemiyasi tufayli 2021 yilning yozida o‘tkazilishi belgilangan Tokio-2020 Olimpiya o‘yinlari vaqti boshqa o‘zgartirilmaydi. Bu haqda Xalqaro Olimpiya qo‘mitasi ma’lum qildi.

XOQ rasmiy sayti xabarida keltirilishicha, Yaponiya hukumati nufuzli musobaqani yana bir bor boshqa muddatga qoldirmaslikka qaror qilishgan. Osiyoliklar rahbariyati pandemiyaning butun jahon bo‘yicha 2020 yilning oxiriga bartaraf etilishiga va keyingi yildan vaziyat to‘la barqaror holatga kelishiga ishonmoqda.

Shuningdek, musobaqaning o‘tkazilishi jarayoniga yuqori darajada tayyorgarlik ko‘rib, barcha xavfsizlik choralari ishlab chiqiladi. Agar Olimpiya o‘yinlari ko‘rsatilgan muddat ichida o‘tkazilmaydigan bo‘lsa, Yaponiyaning nufuziga ham ta’sir ko‘rsatadi deb hisoblashmoqda hukumat vakillari.

Eslatib o‘tamiz, Olimpiya o‘yinlaridan tashqari nufuzli musobaqada ishtirok etish uchun yo‘llanma beruvchi lisenzion turnirlar ham qoldirilgan edi. Ayni paytda XOQ tomonidan bu turnirlarning qayta tiklanishi yoki qay holatda o‘tkazilishi bo‘yicha aniq taklif bildirilmadi.

Jismoniy tarbiya va sport vazirligi
Matbuot xizmati