Bugun O‘zbekiston professional futbol ligasi rahbariyati Pro-liga klublari vakillari bilan videokonferensiya shaklida yig‘ilish o‘tkazdi.

Unda musobaqa formati yuzasidan fikr almashildi. Sir emaski, Pro ligada 8 ta klub dastlabki ikki yo‘llanma uchun kurash olib boradi. Jamoalar 4 davra davomida jami 28 ta turda ishtirok etishlari kerak edi. Karantin holatidan kelib chiqib, davralar soni qisqarishi mumkin. Barchasi mashg‘ulotlarga qachon ruxsat etilishiga bog‘liq.

Maydonlar masalasida "Neftchi", "Dinamo", "Sho‘rtan", "Istiqlol" va "Turon" klublarida muammo yo‘q. "Oqtepa" hamda "Xorazm" sun’iy maydonda o‘z uchrashuvlarini o‘tkazadi. Bu esa tabiiyki, iyul oyida futbolchilarga qiyinchilik tug‘diradi. Shundan kelib chiqib ham, 4 ta davra uchrashuvlarini qayta ko‘rib chiqish masalasi kun tartibida turibdi. "Zomin" futbol klubining stadioni iyun oyiga tayyor bo‘lishi kutilmoqda.  

Ayni vaqtda O‘zPFL mashg‘ulotlarga rasman ruxsat etilish kunini kutib turibdi. Mashg‘ulotlar start olishi hamda maxsus komissiyaning zonalarni qanday ajratishi, viloyatlarga kirish-chiqish masalalaridan kelib chiqib, O‘zPFL keyingi rejalarga aniqlik kiritib oladi.