Fransiyaning muddatidan oldin yakunlangan chempionati natijalari 27 emas, 28-tur natijalariga ko‘ra qayd etildi. Bundan maqsad — "Lion"ni yevrokuboklardan mahrum qilish, deb yozmoqda La Parisien.
27-turdan so‘ng "Lion" beshinchi o‘rinni egalladi va Yevropa Ligasiga yo‘llanma oldi, 28-tur natijalariga ko‘ra esa klub yettinchi o‘ringa tushib ketdi va yevrokuboklarda qatnashish imkonidan ayrildi. Manbaga ko‘ra, faqat "Amyen", "Lill" va "Nant" klublari bu qarorga qarshi chiqishgan. Qolgan klublar ushbu turning bitta "PSJ" — Strasburg" uchrashuvi o‘tkazilmaganiga qaramay, 28-tur natijalari bo‘yicha jadvalni tuzishga rozi bo‘lishgan.
Ta’kidlanishicha, bu qarorga "Lion" prezidenti Jan-Mishel Olas bilan yuzaga kelgan ziddiyat sabab bo‘lgan. Xususan, Olas Qatar mansabdorlari shakllantirgan "PSJ" modelini tanqid qilgandi.
"Liga1"ni muddatidan oldin tugatish qarori 30 aprel kuni e’lon qilingandi.
"Lion" 1997 yildan beri birinchi marta Yevropa musobaqalarida qatnashmaydi. Klub Fransiya professional futbol ligasini sudga bermoqchi.
