Futbolchilik ko‘plab boshqa soha va kasblardan faoliyatning erta yakunlanishi bilan farq qilishi hech kimga sir emas. Hamma Zlatan Ibrahimovich emaski, deyarli 40 yoshda ham top klublar e’tiborida qolaversa. Odatda futbolchi maydondagi harakatlariga nuqta qo‘ygach futbol atrofida qolishda davom etaveradi.

"Butsasini mixga ilgan"lar uchun murabbiylik eng ko‘p uchraydigan tanlovlardan biri. Ammo, shundaylar borki o‘zlarini boshqa juda qiziq aplualarda sinab ko‘radi. Masalan -- siyosatda. Bugun shunday futbolchilar haqida yozmoqchiman.

Avvalambor o‘zini siyosatga urgan to‘pteparlarni ikkiga bo‘lish kerak. Muvaffaqiyatga erishganlar va omadsizlar. Dastlab, o‘zini bir muncha siyosatdon sifatida sinab, keyin bu pozisiyadan chekinganlar haqida to‘xtalsak.

1. Ziko

2008 yil, bir muddat "Bunyodkor"da murabbiy bo‘lib ishlagan afsona 1990-1991 yillarda Braziliya Yoshlar, turizm va sport ishlari vaziri lavozimida faoliyat yuritdi. "Oq Pele"dan so‘ng bu lavozimda asl Pelening o‘zi ham mehnat qilgan. Ammo, u boshqa bizning tarkibimizda bo‘lgani bois alohida to‘xtalamiz hali. Aslida sport vaziri rutbasining ko‘plab davlatlarda sobiq sportchiga topshirilishi tabiiy bir jarayondir. Ziko qisqa faoliyati muvaffaqiyatsiz o‘tgach o‘z havzasiga qaytdi va murabbiylik qila boshladi.

2. Karlos Valderamma.

Yosh muxlis bu nomni eshitmagandir, balki. Ammo, 80-90 yillar futbolining tirik guvohlari bu allambalo turmak sohibi bo‘lgan kolumbiyalikni yaxshi eslashadi. FIFAning tarixdagi eng yaxshi 125 futbolchi ro‘yhatida yagona Kolumbiya vakili bor. U aynan Valderamma. 1987 va 1993 yillarda Janubiy Amerikaning eng yaxshi futbolchisi bo‘lib, mamlakat futbolida birinchi raqamli shaxsga aylangan Karlos keyinchalik davlatning ham birinchi insoniga aylanishni istagandi. 2014 yilda o‘tkazilgan prezidentlik saylovlarida u o‘zining soliqlarni keskin kamaytirishga qaratilgan dasturi bilan nomzod sifatida ishtirok etdi. Ammo, bo‘lmadi. Omadsizlik va endi Valderamma oldindagi siyosiy jarayonlarni kuzatmoqda. Har holda mamlakatda vaziyat oddiy emas.

Davomi keyingi postlarda...

Orif Tolipov.