Ispaniya futbol federasiyasi va La liga rahbariyati uzoq vaqt davom etgan kelishmovchilikdan keyin bir to‘xtamga kelishdi.

Luis Rubiales va Xavyer Tebas jiddiy kelishuvga erishishdi. Chempionat iyun oyida boshlanadi va har kuni uchrashuvlar o‘tkaziladi, jumladan, dushanba kunlari ham. Asosiy shart — har bir klub uchrashuvlar orasida dam olish uchun kamida 72 soat dam olish uchun imkoniyatga ega bo‘ladi.

Uchrashuvlar boshlanish vaqtini belgilash borasida muhokama davom etmoqda. Unchalik issiq bo‘lmagan hududlardagi o‘yinlar Markaziy Yevropa vaqti bilan 20:00 (Toshkent vaqti bilan 23:00)da boshlanadi, issiq viloyatlarda esa o‘yinlarni 23:00 (Toshkent vaqti bilan 02:00)ga belgilash rejalashtirilmoqda.

Ispaniya arbitraj sudi ushbu rejani tasdiqlaganidan keyin rasmiy qaror e’lon qilinadi. Ushbu sud o‘tgan yilning avgust oyida chempionat o‘yinlarini juma, shanba va yakshanba kunlari o‘tkazishga ruxsat berib, dushanba kuni o‘tkazishni taqiqlagan edi.

Har kuni o‘yin o‘tkazish orqali La liga 29 iyulga qadar mavsumni yakunlashga ulguradi. 2 avgust sanasidan esa yevrokuboklarning qolgan bosqichi o‘ynaladi.