Yurtimizda Olimpiya dasturiga kiritilgan har bir sport turiga e’tibor kundan kunga ortib bormoqda. Shunday sinovli kunlarda turgan bo‘lsak-da, hukumatimiz sport sohasidagi yirik loyihalarni qo‘llab-quvvatlashda davom etmoqda.
Ayni kunlarda Jizzax shahridagi Sangzorko‘l mavzesida velosiped sportining Olimpiya o‘yinlari dasturiga kiritilgan VMX yo‘nalishi bo‘yicha yurtimizdagi dastlabki trassa qurilishi boshlandi. Bu esa mamlakatimizda sportning ushbu yo‘nalishiga bo‘lgan qiziqishning yanada ortishiga xizmat qiladi. Hozirda Jizzax viloyati hokimligi hamda O‘zbekiston velosiped sporti federasiyasi rahbariyati trassa uchun ajratilgan hududni yaqindan o‘rganib chiqishmoqda. Ta’kidlash joiz, qurilish viloyat hokimligi tashabbusi bilan bunyod etilmoqda va loyihalashtirilmoqda.
VMX Olimpiya o‘yinlarida yangi sport turlaridan bo‘lib, unda ishtirokchilar guruh bo‘lib startdan qo‘zg‘alishida va uzunligi katta bo‘lmagan, ammo murakkab yo‘llarda poyga o‘tkazishadi. Ushbu sport turi 2008 yildan yozgi Olimpiya o‘yinlari dasturiga kiritilgan.
Jizzaxda qurilajak trassa Ukraina, Fransiya va belgiyalik mutaxassislar tomonidan loyihalashtiriladi va ekspertlar qurilish ishlari boshlangach bevosita jarayonni nazorat qilib borishadi (xalqaro parvozlar ochilgach). Dastlabki hisob-kitoblarga ko‘ra, trassa sentyabr oyida ochilishi kutilmoqda.
