Joriy yilning 4-5 iyun kunlari Osiyo Futbol Konfederasiyasiga a’zo assosiasiyalar bosh kotiblari ishtirokida 2020 yilgi onlayn konferensiya o‘tkaziladi.

Qit’a futbol uyushmasining barcha mintaqaviy assosiasiyalari uchun navbatma-navbat tashkil etiladigan onlayn konferensiyaning dastlabkisida Markaziy va Janubiy Osiyoda joylashgan futbol assosiasiyalari bosh kotiblari qatnashadi. Jumladan, mazkur konferensiyada O‘FA bosh kotibi Avaz Maksumov ham ishtirok etadi.

Mazkur konferensiyaning asosiy maqsadi – OFKga a’zo mamlakatlar futbol assosiasiyalari o‘rtasidagi aloqalarni yanada mustahkamlash hamda qit’a futbol uyushmasi tomonidan amalga oshiriladigan dastur, loyiha hamda tashabbuslar bo‘yicha yanada to‘liqroq ma’lumot berishdan iborat bo‘ladi.

Har yili tashkil etiladigan ushbu konferensiyada bu yil shuningdek, OFKning mintaqaviy assosiasiyalari rahbarlari ham qatnashadi.

Ikki kunlik konferensiya davomida bosh kotiblar zamonaviy futbol boshqaruv tizimidagi so‘nggi yangiliklar, tizimdagi yangi o‘zgarishlar xususida yanada ko‘proq ma’lumotlar olish imkoniyatiga ega bo‘lishadi.