PFL tomonidan Pro-liga bahslari 4 iyul kunidan, O‘zbekiston kubogi saralash bosqichi esa 23 iyun kunidan start olishi e’lon qilindi.

Shunga muvofiq, qariyb uch oylik karantin davridan keyin «Dinamo» jamoasi belgilangan talab va ehtiyot choralariga amal qilgan holda 10 iyun kunidan boshlab Samarqanddagi qarorgohida yangi mavsumga tayyorgarlikni boshlaydi.

Xususan, 8 iyun dushanba kuni «Dinamo» klubi qarorgohi sanitariya-epidemiologik osoyishtalik agentligi tomonidan to‘liq dezinfeksiya qilinadi.

9 iyun seshanba kuni esa jamoaning barcha futbolchilari va personal xodimlari klub bazasida yig‘ilib, koronavirusga tibbiy test topshirishadi. Shu kunning o‘zida test natijalari taqdim etiladi.

10 iyun chorshanba kunidan esa jamoa a’zolari yangi mavsumga tayyorgarlik ishlarini boshlashadi. Kuniga ikki mahaldan mashg‘ulotlar o‘tkazilishi rejalashtirilgan.

Ma’lumot uchun, «Dinamo» 23-28 iyun kunlari O‘zbekiston kubogi saralashi doirasida o‘yin o‘tkazsa, 3 iyul kuni Pro-liga 1-turi doirasida Farg‘onada «Neftchi» klubi mehmoni bo‘ladi.