«Tottenxem» yarim himoyachisi Dele Alli Angliya futbol assosiasiyasi (FA) tomonidan bitta o‘yinga chetlatildi. Angliyalik futbolchi fevral oyida koronavirus bilan bog‘liq qilgan hazili uchun shunday jazoga tortildi.

24 yoshli o‘shanda Snapchat orqali Xitrou aeroportidan video joylagandi. Avvaliga kamera qarshisida Osiyo millatiga mansub shaxs paydo bo‘ladi, keyin esa Dele Alli paydo bo‘lib, o‘zini antiseptik dori bilan davolagan shaxs bo‘lib, «bu virusdan tezroq va osonroq qutilish kerak”, dedi. Oradan biroz o‘tib, Dele Alli ushbu videoni o‘chirib tashladi va barchadan kechirim so‘radi.

Futbol assosiasiyasi, shuningdek, Dele Allini 50 ming funt sterling miqdorida jarimaga tortib, unga ta’lim kursini o‘tash majburiyatini yukladi.

«FA'ning qaroriga javoban men yana bir marta o‘z xulqim uchun uzr so‘rashni istardim. Bu virus haqidagi yomon hazil bo‘ldi. FA mening hazilimni ataylab qilingan irqchilikka yo‘ymagani uchun minnatdorchilik bildiraman. Biz qilayotgan ishlarimizni va buni boshqalar qanday qabul qilishi mumkinligini yaxshi anglashimiz kerak», — dedi Dele Alli «Tottenxem» rasmiy saytiga bergan intervyusida.

Shu tariqa, yarim himoyachi APLning 30-turi doirasida «Manchester Yunayted»ga qarshi 19 iyun kuni bo‘ladigan uchrashuvni o‘tkazib yuboradi.