"Paxtakor" Superliganing 4-turida Jizzaxda "So‘g‘diyona" mehmoni bo‘ladi va mavsumni davom ettiradi.

Karantin paytida mashg‘ulotlar o‘tkazishga ruxsat berilganidan so‘ng jamoamiz "Jar" stadionida mashg‘ulotlar o‘tkazib, o‘yinga tayyorgarlikni olib bordi. Bosh murabbiy Shota Arveladze va darvozabonlar murabbiyi Ibrohim Yilmaz bellashuv arafasida mashg‘ulotlarga qaytishdi.

"So‘g‘diyona" va "Paxtakor" O‘zbekiston chempionatlari tarixida 48 bor to‘qnash kelgan. Ularning 40tasida "Sherlar" g‘alaba qozongan bo‘lsa, 4tadan bellashuvda durang va jizzaxliklar zafari kuzatilgan. Raqib darvozasi 123 marta ishg‘ol etilib, 38 to‘p o‘tkazib yuborilgan. Jizzaxdagi o‘yinlarning 18tasida "Paxtakor" muvaffaqiyatga erishgan. Uch martadan esa mezbonlarning qo‘li baland kelgan va durang natija qayd etilgan. Jizzaxda o‘tgan yili kechgan bahsda "Paxtakor" 2:1 hisobida muvaffaqiyatga erishgan. 2013 yil esa 0:0 hisobida tugagan uchrashuvda "So‘g‘diyona" uydagi oxirgi ochkosini qo‘lga kiritgan. Safardagi so‘nggi 6 bahsda "Paxtakor" ketma-ket g‘alabaga erishgan.

Mezbonlar tarkibida diskvalifikasiya sababli yuzaga kelgan yo‘qotish mavjud. Qizil kartochka tufayli Shavkat Mullajonov maydonga tusha olmaydi. Jamoamiz safida bunday yo‘qotish uchramaydi. Sadriddin Abdullayev, Akrom Komilov va Javohir Sidiqov jarohatdan tiklanishga ulgurishdi.

"So‘g‘diyona" va "Paxtakor" jamoalari o‘rtasidagi bellashuv 14 iyun, yakshanba kuni "So‘g‘diyona" stadionida soat 18:00da boshlanadi.