Coca Cola Superliga 4-turidan o‘rin olgan “Qizilqum” hamda AGMK jamoalari o‘rtasidagi o‘yindan so‘ng mezbonlar ustozi Tachmurod Agamurodov uchrashuv haqidagi o‘z fikrlarini bildirib o‘tdi.

“Hamma tushunib turibdi, qiyin o‘yin o‘tkazdik. Bizda tayyorgarlik uchun vaqt kam bo‘ldi. Lekin, kelgusi o‘yinlarga yuqori kayfiyatni saqlagan holda hozirlik ko‘rishga harakat qilamiz. Futbolchilar uch oydan so‘ng maydonga qaytishdi. Men jamoaga kelganimga 8 kun bo‘ldi. Jismoniy holat bo‘yicha ko‘zga tashlangan muammolarni birinchi o‘yin uchun normal holat, deb hisoblayman. Men allaqachon jamoaga moslashib ulgurdim. Keyingi turgacha bizda o‘z ustimizda ishlash uchun imkoniyat bo‘ladi”, – dedi Agamurodov.