Superligada mavsumning eng qiziqarli uchrashuvlaridan biri bugun bo‘lib o‘tadi. Futbolni sog‘ingan muxlislar soat 20:00 dan e’tiboran “Paxtakor” va “Bunyodkor” jamoalari o‘rtasidagi poytaxt derbisi guvohiga aylanishadi.

Ma’lumot uchun, ushbu jamoalar chempionat doirasida hozirga qadar 28 bor to‘qnash kelgan bo‘lib, kichik ustunlik “sherlar” tarafida. O‘zaro uchrashuvlarning 10 tasida “Paxtakor” zafar quchgan, 9 ta bahsda “qaldirg‘ochlar”ning qo‘li baland kelgan. 9 uchrashuvda esa durang natija qayd etilgan. To‘plar nisbati – 31-30, “Paxtakor” foydasiga.

“Sherlar”ning mazkur derbida qozongan eng yirik g‘alabasi 4:0, “Bunyodkor”niki esa 3:0 ni tashkil etadi.

Ushbu qarama-qarshilik soat 20:00 da “Sport” telekanali orqali jonli efirda namoyish etiladi.

Eslatib o‘tamiz, mazkur uchrashuv yurtimizda joriy qilingan karantin qoida va me’yorlari sabab muxlislarsiz o‘tkaziladi.