Суперлигада мавсумнинг энг қизиқарли учрашувларидан бири бугун бўлиб ўтади. Футболни соғинган мухлислар соат 20:00 дан эътиборан “Пахтакор” ва “Бунёдкор” жамоалари ўртасидаги пойтахт дербиси гувоҳига айланишади.
Маълумот учун, ушбу жамоалар чемпионат доирасида ҳозирга қадар 28 бор тўқнаш келган бўлиб, кичик устунлик “шерлар” тарафида. Ўзаро учрашувларнинг 10 тасида “Пахтакор” зафар қучган, 9 та баҳсда “қалдирғочлар”нинг қўли баланд келган. 9 учрашувда эса дуранг натижа қайд этилган. Тўплар нисбати – 31-30, “Пахтакор” фойдасига.
“Шерлар”нинг мазкур дербида қозонган энг йирик ғалабаси 4:0, “Бунёдкор”ники эса 3:0 ни ташкил этади.
Ушбу қарама-қаршилик соат 20:00 да “Спорт” телеканали орқали жонли эфирда намойиш этилади.
Эслатиб ўтамиз, мазкур учрашув юртимизда жорий қилинган карантин қоида ва меъёрлари сабаб мухлисларсиз ўтказилади.
