UEFA ijroiya qo‘mitasi Yevropa qit’asida JCH-2022 saralash bosqichi tartibi va qur’a mexanizmini tasdiqladi. Endi FIFA buni tasdiqlanishi kerak.

Qatarda bo‘ladigan jahon chempionati uchun 13ta yo‘llanma ajratilgan. Saralash bosqichi 2021 yilning mart oyida start oladi va 2022 yilning mart oyida pley-off o‘yinlari bilan yakuniga yetadi.

Qur’a tashlash marosimi qachon va qayerda o‘tkazilish masalasiga keyinroq oydinlik kiritiladi. UEFAga a’zo barcha terma jamoalar 10ta guruhga taqsimlanadi (5ta guruhda 6ta jamoa, 5ta guruhda 5tadan jamoa). Qur’adan oldin jamoalar 6ta savatchaga ajratiladi (FIFA reytingining 18.11.2020 holatiga asosan).

10ta guruh g‘oliblari JCH-2022 yo‘llanmasini qo‘lga kiritishadi.

Guruhlarda ikkinchi o‘rinni egallagan 10ta terma jamoa hamda Millatlar ligasi-2020/2021 musobaqasida guruh g‘oliblari orasida eng yaxshi natijaga ega bo‘lgan 2ta jamoa (JCH-2022 saralash guruhlarida yuqori 2ta o‘rinni egallamagan termalar) ikkita bosqichdan iborat pley-offda ishtirok etishadi. Birinchi bosqichda o‘zaro o‘yinlar orqali 6ta g‘olib aniqlanadi, ikkinchi bosqichda esa JCHga chiqadigan 3ta jamoaning nomi aniq bo‘ladi.

Eslatib o‘tamiz, Qatardagi jahon chempionati 2022 yilning 21 noyabridan 18 dekabrgacha bo‘lgan muddatda o‘tkaziladi.