Karantingacha bo‘lgan davrda «Milan» klubi ketma-ket 2ta o‘yinda g‘alaba qozona olmagan edi. Uch oylik tanaffusdan keyin "rossoneri" nihoyat g‘alaba qozonishga muvaffaq bo‘ldi.

Birinchi bo‘limda qanotdan uzatilgan to‘pni Kastiyexo mezbonlar darvozasiga burib qo‘yib, hisobni ochgan bo‘lsa, oradan ko‘p o‘tmasdan "Lechche" hisobni tenglashtirgandi. Ammo kichik ofsayd tufayli gol inobatga olinmadi.

Maydon egalari ikkinchi bo‘lim boshida penaltidan muvozanatni tiklashdi. "Milan" esa o‘sha zahoti 2ta to‘p bilan javob qaytardi. Gol mualliflari — Bonaventura va Rebich. Oradan ko‘p o‘tmasdan Rafael Leau milanliklarning to‘rtinchi golini urib, o‘yin taqdirini butunlay hal qilib qo‘ydi.

Ushbu g‘alaba tufayli "Milan" o‘z ochkolarini 39taga yetkazib, jadvalda 7-o‘ringa ko‘tarilib oldi. Jamoa yevrokuboklarga yo‘llanma beradigan o‘rinlar uchun kurashni davom ettiradi.

Italiya A seriyasi, 27-tur
Lechche – Milan 1:4 (0:1, 1:3)
Gollar: 0:1 – 26 Kastilyexo, 1:1 – 54, penalti Mankozu, 1:2 – 55 Bonaventura, 1:3 – 57 Rebich, 1:4 – 72 Rafael Leau.
Lechche – Gabriel, Rispoli, Luchoni, Mekkaryello, Kalderoni, Petrichchone, Taxsidis, Mankozu (Shaxov, 87), Saponara (Vera, 87), Falko, Lapadula (El-Babakar, 46).
Milan – Donnarumma, Konti, Kyer (Gabbiya, 40), Romanyoli, Teo, Kessie (Lukas Paketa, 87), Bennaser, Kastilyexo (Salemakers, 68), Bonaventura (Bigliya, 86), Chalxanoglu, Rebich (Rafael Leau, 68).
Ogohlantirishlar: Luchoni (49), Gabbiya (63).