Ispaniya chempionatining 31-turi doirasida «Barselona» o‘z uyida «Atletik Bilbao»ni qabul qilib, qiyin g‘alabani qo‘lga kiritdi.

Kataloniyaliklar o‘yinni ancha tajovuzkor boshlashdi. Bahs boshida Busketsning aniq zarbasini himoyachi bosh bilan qaytarib qolgan bo‘lsa, Suaresning zarbasidan keyin to‘pni darvozabon egallab oldi.

Bilbaoliklar esa o‘zlariga kelib olishdi va tanaffusga qadar raqibning xavfli vaziyat yaratishiga yo‘l qo‘yishmadi.

Ikkinchi bo‘lim boshida Messining uzatmasidan keyin Grizmann darvozabon bilan yuzma-yuz holatda qoldi, ammo uning zarbasini Unay Simon ko‘kragi bilan qaytardi. Ikkinchi bo‘lim o‘rtalarida maydonga Puch, Rakitich va Fatining tushirilishi "Barsa"ning o‘yinini jonlantirdi.

Bahsning 71-daqiqasida mezbonlar hisobni ochishdi. Tashkil etilgan keskin hujum natijasida Messi raqib jarima maydoni ichida himoyachini aldayotgan paytda Rakitich to‘pni ilib ketdi va yakkama-yakka vaziyatda darvozani ishg‘ol qildi.

Ikkinchi bo‘limga qo‘shib berilgan daqiqalarda "ko‘k-anorranglilar" hisobda farqni oshirishlari kerak edi. Alba chap qanotdan yetkazgan uzatmani Vidal yerga tushirmasdan darvoza tomon tepdi. Unay Simon qaytargan to‘pni Fati yaqin masofadan yana darvoza tomon tepdi. To‘p ustunga tegib qaytdi.

Ushbu g‘alaba evaziga "Barselona" o‘z ochkolarini 68taga yetkazib, 1-o‘ringa ko‘tarilib oldi.

Ispaniya La ligasi, 31-tur
Barselona – Atletik 1:0 (0:0, 1:0)
Gol: 1:0 – 71 Rakitich.
Barselona – ter Stegen, Alba, Semedu, Langle, Pike, Buskets (Rakitich, 64), Vidal, Artur (Puch, 56), Suares (Breytueyt, 85), Grizmann (Fati, 65), Messi.
Atletik – Unai Simon, Balensiaga, De Markos, Yeray Alvares, Lekue (Kapa, 69), Unai Lopes (Dani Garsiya, 57), Vesga, Kordoba (Muniain, 57), Sanset (Raul Garsiya, 78), Nunyes, Uilyams (Vilyalibre, 69).
Ogohlantirishlar: Buskets (32), Nunyes (62), Rakitich (90).