27 iyun kuni Coca Cola Superliga 6-turi doirasida Bekobodning “Metallurg” jamoasi o‘z maydonida Namanganning “Navbahor” klubini qabul qiladi.

Mazkur jamoalar Superliga (oliy liga)da shu kungacha 46 marotaba o‘zaro ro‘baro‘ kelishgan. O‘tkazilgan o‘yinlarning  20tasida “lochinlar” g‘alaba qozonishgan bo‘lsa, 13ta uchrashuvda bekobodliklar zafar quchishgan, 13ta bahsda esa jamoalar durangga imzo chekishgan.

To‘plar nisbatidagi ustunlik "Navbahor" tomonida: 65 — 47.

O‘zaro o‘yinlarda namanganliklar 73 ochko, bekobodliklar esa 52 ochkoni qo‘lga kiritishgan. “Navbahor”ning “Metallurg” ustidan qozongan eng yirik g‘alabasi 7:0ga teng bo‘lsa, bekobodliklarning namanganliklar ustidan erishgan eng yirik g‘alabasi – 5:1.

O‘z o‘rnida ta’kidlash joizki, Bekobodda bo‘lib o‘tgan 23ta o‘yindan 12 tasida mezbonlar g‘alaba qozonishgan, 8ta bahsda durang qayd etilgan, 3ta o‘yinda esa “Navbahor” zafar quchgan.    

Eslatib o‘tamiz, mazkur uchrashuv  27 iyun kuni Bekoboddagi “Metallurg” o‘yingohida soat 19:00da start oladi.

Bo‘lajak bahsda sevimli jamoamizga omad yor bo‘lishini tilab qolamiz.

“Navbahor” PFK matbuot xizmati.