O‘zbekiston Superligasi 6-turidan o‘rin olgan "Bunyodkor" hamda "Lokomotiv" o‘yinidan keyin (2:0) "temiryo‘lchilar" futbolchisi Davron Umirov o‘yin haqida fikr bildirdi.
"To‘g‘risi, nima bo‘layotganini tushunmayapman. Biz har bir o‘yinda g‘alaba qozonish uchun maydonga chiqyapmiz. Bunday vaziyat har bir jamoada bo‘ladi. "Lokomotiv" avval bunaqa holatga tushmagan, lekin bu bizning oldinga yurishimizga sababchi bo‘ladi.
"Temiryo‘lchilar" doim oldiga yuqori maqsadlarni qo‘yib kelgan va bundan keyin ham shunday bo‘ladi. To‘g‘ri, oxirgi o‘yinlarda mag‘lubiyatga uchradik, lekin bu bilan "Loko"ni chempionlik kurashidan chiqarish noto‘g‘ri.
Ko‘p futbolchilarimiz jarohatidan endi sog‘ayishdi. Bu o‘yin darajamizga o‘z ta’sirini o‘tkazmay qolmadi. Keyingi o‘yinlarda xatolarni kamaytirishga harakat qilamiz. Nasib qilsa, navbatdagi o‘yinlarda g‘alaba qozonib, muxlislarimizni xursand qilamiz", -deydi futbolchi saytimiz uchun bergan intervyusida.
