Xabaringiz bor, bugun Zomin shahrida ayollar futboli bo‘yicha VI O‘zbekiston Superkubogi bo‘lib o‘tadi. O‘tgan mavsum O‘zbekiston kubogini qo‘lga kiritgan Toshkentning “Bunyodkor-W” klubi mamlakat chempioni Qarshining “Sevinch” jamoasiga qarshi bahs olib boradi. Uchrashuv oldidan “Bunyodkor-W” yarim himoyachisi Luiza Sadirovaning o‘yin oldi fikrlari bilan qiziqdik. 

- Karantin futbolchilarning o‘yiniga qay darajada ta’sir qildi?

- Albatta ta’siri kuzatiladi. Aminmanki, nafaqat bizning jamoada, balki boshqa jamoalarda ham ushbu holat kuzatiladi. Karantin paytida hamma yakka tartibda mashg‘ulot olib borganiga qaramay, futbol jamoaviy o‘yin. Shu sabab jamoaviy mashg‘ulot talab etiladi.

- Jamoa mavsumning dastlabki o‘yiniga tayyormi?

- Karantin sabab uzoq muddatli tanaffus bo‘lganiga qaramay, biz ruhan a’lo darajada o‘yinga tayyormiz. Barchamiz yashil maydonni, to‘pni sog‘inganmiz. Fikrimcha har ikki jamoa tomonidan murosasiz kurash bo‘ladi. Bunday uchrashuvlarda kuch tejab o‘ynalmaydi. Biz Superkubokni qo‘lga kiritish uchun bor kuchimizni sarflaymiz.