Superliganing 7-turida AGMK o‘z maydonida "Nasaf"ni qabul qiladi. Turning markaziy o‘yini deya e’tirof etilayotgan bahs oldidan olmaliqliklar himoyachisi Erkin Baydullayev o‘z fikrlari bilan o‘rtoqlashdi.
"Nasaf"ga doim muxlislik qilaman, sababi o‘zim 6 yil "ajdarlar" sharafini himoya qilganman. O‘sha vaqtdagi yigitlar bilan haligacha yig‘ilib turamiz. Hozir u futbolchilarning ko‘pchiligi "Paxtakor"da, qolganlari boshqa klublarda to‘p tepishmoqda. Ro‘ziqul aka bilan ham haligacha gaplashib turamiz. Hozirgi "Nasaf"ning tarkibi ancha yoshargan, deyarli barchasi akademiyadan chiqqan. Menimcha, "Nasaf" kuchli uchlikka kira oladigan jamoa.
Ularga qarshi o‘yinga har tomonlama tayyor bo‘lishimiz kerak. Ro‘ziqul akaning jamoasi o‘yin vaqtida har xil sxemada o‘ynab ko‘radi. Sobiq shogirdi sifatida buni yaxshi bilaman".
"Mash’al"ga qarshi kechgan o‘yin haqida
"Mash’al" golgacha 5 ta himoyachi bilan o‘ynadi. Goldan keyin esa bizga qiyin bo‘ldi, chunki ular ko‘proq hujumga o‘tishdi. Biz o‘yin so‘nggiga qadar hisobni saqlab qolishga harakat qildik.
Gol urish uchun bizda kam vaziyat bo‘ldi. O‘sha o‘yinda bizga Elguja yetishmadi. U o‘ynamagan o‘yinlarda hujum tashkil qilishimiz qiyinroq bo‘lyapti. U ma’suliyatni o‘ziga ola biladigan futbolchi. Nasib qilsa, navbatdagi o‘yinlarda yorqinroq o‘yin ko‘rsatishga harakat qilamiz. Maqsadimiz, OCHLga yo‘llanmani qo‘lga kiritish".
