"Paxtakor" bosh murabbiyi "Surxon" bilan uchrashuvdan keyingi matbuot anjumani o‘yin haqida fikrlarini bildirdi.

- Bugun o‘yinni to‘liq nazorat qildik. Juda ko‘plab vaziyatlarga ega bo‘ldik. Anchagina tez va chiroyli futbol namoyish qila oldik. Avvalgi holatga qaytib boryapmiz deb o‘ylayman. Raqib esa dastlabki daqiqalardan chuqur himoyalanishga o‘tdi. 20 daqiqa ichida eng kamida bir gol urishga munosib o‘yin ko‘rsatdik. Biroq keyin penaltidan gol o‘tkazib yubordik. Shunga qaramay, birinchi bo‘limning o‘zida ikki chiroyli to‘p kiritgan holda oldinga chiqdik. Bunday paytda o‘yinning borishi to‘g‘risida yigitlarga ko‘rsatma berish, o‘yinga tuzatish kiritish osonroq. Ikkinchi bo‘limda ham ustunlikni davom ettirdik. Raqib tarkibida hujumkor o‘yinga moslashgan futbolchilar soni ko‘p, ammo ular haddan tashqari himoyaviy o‘yin namoyish qilishadi. Ular biz kutgandek himoyada o‘ynab, standart holatlar va qarshi hujumlardan foydalanishga urinishdi.

Biz uchta gol urgan o‘yinimizdan ham ko‘ngli to‘lmayotganlar borligi juda yaxshi. Bu biz uchun ijobiy jihat. Futbolda har bir vaziyatdan foydalanishning imkoni yo‘q. Lekin uchta gol ham kamdek ko‘rinar ekan, demak, bizdan ko‘proq narsa kutishmoqda. Jamoa uchun buni juda yaxshi deya olaman.