Superliga 8-turi doirasida "Qo‘qon-1912" uchrashuvidan keyingi matbuot anjumanining ikkinchi qismida AGMK bosh murabbiyi Mirjalol Qosimov qatnashdi.
- O‘yin juda ham shiddatli va jangovar tarzda kechdi. Chunki, ushbu jamoalar turnir jadvalida ikkinchi, uchinchi o‘rinlarda borishayotgandi. Shu boisdan birinchi bo‘lib gol urgan jamoa g‘alaba qozonishi kerak edi. Ikkinchi bo‘limda omadimiz keldi. O‘yinni biroz kuchaytirdik va tezda birinchi golni urib oldik. Ikkinchi golda esa, menimcha Sanjar rostdan ham yil golini urdi. Shunday chiroyli goli bilan u jamoamizga g‘alaba keltirdi. 2:0 hisobini yomon ko‘raman. 1:0 paytida jamoa ehtiyotkorlikni kuchaytiradi. Shuningdek, "Qo‘qon-1912" jamoasiga ham qoyil qoldim, ular ikki to‘p farqi bo‘lishiga qaramasdan oxirigacha kurashishdi. Bunday o‘yinlar orqali nafaqat futbolchilar, balki muxlislar va o‘zbek futboli ham yutadi.
Futbol shunday narsaki, hujumchi chap qanot himoyasida chap qanot himoyachisi bo‘lib o‘ynashi kerak. Himoyachi esa hujumda hujumchi bo‘lib o‘ynashi kerak. Qachonki futbolchilar doimo bir-birining o‘rnini to‘ldirib yursa, futbol yanada chiroyli bo‘ladi.
Saydullada sariq kartochka bor edi. Shu sababdan uni almashtirdim. Negaki, tezkor futbolchi katta tezlik bilan yugurib ketayotgan paytda yiqitilsa, ikkinchi sariq va bu qizilga aylanib ketishi mumkin edi.
Hozirgi zamonaviy futbolda g‘alabaga erishish juda qiyin. Undan tashqari, buning uchun katta mehnat qilish kerak. Shu orqali inson xursandchilikni o‘ziga taqdim qiladi.
"Bunyodkor"ga qarshi o‘yinni biz ko‘rib chiqdik. Mehmonda o‘ynaganini inobatga olsak, "Qo‘qon-1912" unchalik himoyaviy o‘ynagani yo‘q. So‘nggi daqiqalarda bo‘lgan avtogol esa futbolning bir qismi. Shuning uchun ham men bu gapga qo‘shilmayman.
"Qo‘qon-1912"ning bugungi hujumkor o‘yini bizga syurpriz bo‘lmadi. Undan tashqari jamoa ikki nafar tayanch yarim himoyachi bilan o‘ynadi. O‘sha “Bunyodkor” bilan bo‘lgan o‘yinda ham ikkinchi bo‘lim davomida sxemalar o‘zgargandi. Bu futbolda tez-tez uchrab turadigan murabbiyning falsafasi.
