Bugun Pro liganing 3-turidan o‘rin olgan "Oq-tepa"-" Neftchi " (1:1) bellashuvi yakuniga yetgach, farg‘onaliklar murabbiyi Abdusamad Do‘rmonov o‘z fikrlarini bildirib o‘tdi.

"O‘yinni ko‘rdinglar, ko‘plab xavfli vaziyatlar yaratdik. Ammo, to‘p darvozaga kirmadi. Futbol shunaqaki, yaratilgan yarimta imkoniyatdan ham unumli foydalanish kerak. Bu jabhada hujumchilarimizga sovuqqonlik yetishmadi. U himoyachi yoki hujumchi bo‘lishidan qat’iy nazar doimo o‘z ustida ishlashi lozim. Yakunda durang qayd etgan bo‘lsakda, umuman olganda yaxshi o‘yin bo‘ldi.

Dilyorbek Irmatovning jarohati tufayli bugun unga dam berdik. Umid qilamizki, keyingi uchrashuvga qadar safimizga qaytadi. Jamoamizdagi barcha o‘yinchilarga ishonch bildirishga harakat qilyapmiz.

Pro ligani televideniye orqali translyasiya qilinishi quvonarli holat. Bu jarayon futbolimizning bir bo‘lagidir. Buning ustiga karantin sababli muxlislar stadionga kiritilmayotir. Shu tariqa, ishqibozlar ham Pro ligani teleekran orqali tomosha qilib borishsa maqsadga muvofiq bo‘lardi. Superligaga chiqishga esa imkoniyatlarimiz yetadi", — dedi Abdusamad Do‘rmonov.