Xabaringiz bor, «Nasaf» jamoasi O‘zbekiston Superligasi 9- turida Qo‘qonning “Qo‘qon-1912“ jamoasi mehmoni bo‘lgandi (2:2). Aynan shu bellashuvda «ajdarlar» o‘zlarining yangi formalarida harakat qilishdi. E’tibor qilgan bo‘lsangiz yangi formada jamoaning yangi ramzi aks ettirilgan.

O‘zingizga ma’lum, jamoamiz 2009-2011 yillardagi sport formasida ajdar ramzi tushirilgan logotipdan foydalangan edi. Jamoamizning xalq orasidagi nomi ham aynan «ajdarlar» deb yuritiladi. Klubimiz rahbariyati mavsum avvalida ko‘p sonli muxlislarning takliflarini inobatga olgan holda yana ushbu ramzga yangicha ruhda qaytishni niyat qilgan edi. Ammo butun dunyo bo‘ylab yoyilgan koronavirus pandemiyasi tufayli rejalarni biroz cho‘zib turishga to‘g‘ri keldi.

Jamoamiz logotipida «ajdar» timsolining aks etishi ham shahrimiz tarixiga borib taqaladi. 2006 yilda Qarshi shahrining 2700 yillik yubileyi nishonlanganida xabaringiz bor. Aynan shahrimiz tarixini o‘rganish jarayonida shahrimiz yaqinidagi Yerqo‘rg‘on tepaliklaridan «ajdar» timsoli aks ettirilgan tangalar topilgan!