Хабарингиз бор, «Насаф» жамоаси Ўзбекистон Суперлигаси 9- турида Қўқоннинг “Қўқон-1912“ жамоаси меҳмони бўлганди (2:2). Айнан шу беллашувда «аждарлар» ўзларининг янги формаларида ҳаракат қилишди. Эътибор қилган бўлсангиз янги формада жамоанинг янги рамзи акс эттирилган.

Ўзингизга маълум, жамоамиз 2009-2011 йиллардаги спорт формасида аждар рамзи туширилган логотипдан фойдаланган эди. Жамоамизнинг халқ орасидаги номи ҳам айнан «аждарлар» деб юритилади. Клубимиз раҳбарияти мавсум аввалида кўп сонли мухлисларнинг таклифларини инобатга олган ҳолда яна ушбу рамзга янгича руҳда қайтишни ният қилган эди. Аммо бутун дунё бўйлаб ёйилган коронавирус пандемияси туфайли режаларни бироз чўзиб туришга тўғри келди.

Жамоамиз логотипида «аждар» тимсолининг акс этиши ҳам шаҳримиз тарихига бориб тақалади. 2006 йилда Қарши шаҳрининг 2700 йиллик юбилейи нишонланганида хабарингиз бор. Айнан шаҳримиз тарихини ўрганиш жараёнида шаҳримиз яқинидаги Ерқўрғон тепаликларидан «аждар» тимсоли акс эттирилган тангалар топилган!