So‘nggi haftalarda «Bunyodkor» yarimhimoyachisi Jasur Jaloliddinovning Moskvaning "Lokomotiv" klubiga o‘tayotgani haqida xabarlar tarqaldi. «Bunyodkor» bosh direktori Ulug‘bek Mirzayev Kun.uz saytga bergan intervyusida futbolchining transferi qanchaga tushayotgani ma’lum qildi.

"Jasur Jaloliddinov transferi bo‘yicha Moskvaning «Lokomotiv» klubi bilan muzokaralar davom etayapti. Futbolchimiz ushbu klubga o‘tish ehtimoli katta. Hozircha transferni rasmiylashtirish ishlari oxiriga yetkazilgani yo‘q. Muzokarani so‘nggi bosqichi davom etayapti. Barchasi muvaffaqiyatli yakunlangan taqdirda ham, hozirgi pandemiya sharoitida uning Moskvaga yetib borish masalasi oson bo‘lmaydi.

Transfer narxini yashirib o‘tirmayman. Bugungi kunda «Lokomotiv» klubi Jasur Jaloliddinovni umumiy 350 ming yevro miqdoridagi transfer puli evaziga sotib olayapti. Futbolchimiz 18 yoshga to‘lganligi uchun ular ham xarajatga yarasha Jasur bilan ko‘p yillik shartnoma tuzishsa kerak. Har holda masalan, biz ham birorta yosh futbolchini katta pulga sotib olsak, shunday yo‘l tutamiz. Moskva klubi ham o‘zbekistonlik futbolchi bilan kamida 5 yillik shartnoma imzolasa kerak.

Jasurga Turkiyaning «Beshiktosh» klubidan ham rasmiy taklif bo‘ldi. Shuningdek, taklif bo‘lmasa-da, Belgiyaning «Anderlext» klubidan, Moldovaning yetakchilaridan, Ispaniya va BAA klublaridan qiziqish mavjud. Ammo ular bilan faqat og‘zaki murojaat bo‘ldi, rasmiy taklifni esa «Lokomotiv» Moskva hamda «Beshiktosh»dan oldik. Jasurning o‘zi «Lokomotiv» klubida to‘p surishga qaror qilgani tufayli, uning istaklarini inobatga olgan holda hozirda Rossiya klubi bilan muzokaraning yakuniy bosqichini olib borayapmiz. Barchasi tez orada hal bo‘ladi", — dedi Ulug‘bek Mirzayev.