Сўнгги ҳафталарда «Бунёдкор» яримҳимоячиси Жасур Жалолиддиновнинг Москванинг "Локомотив" клубига ўтаётгани ҳақида хабарлар тарқалди. «Бунёдкор» бош директори Улуғбек Мирзаев Kun.uz сайтга берган интервьюсида футболчининг трансфери қанчага тушаётгани маълум қилди.

"Жасур Жалолиддинов трансфери бўйича Москванинг «Локомотив» клуби билан музокаралар давом этаяпти. Футболчимиз ушбу клубга ўтиш эҳтимоли катта. Ҳозирча трансферни расмийлаштириш ишлари охирига етказилгани йўқ. Музокарани сўнгги босқичи давом этаяпти. Барчаси муваффақиятли якунланган тақдирда ҳам, ҳозирги пандемия шароитида унинг Москвага етиб бориш масаласи осон бўлмайди.

Трансфер нархини яшириб ўтирмайман. Бугунги кунда «Локомотив» клуби Жасур Жалолиддиновни умумий 350 минг евро миқдоридаги трансфер пули эвазига сотиб олаяпти. Футболчимиз 18 ёшга тўлганлиги учун улар ҳам харажатга яраша Жасур билан кўп йиллик шартнома тузишса керак. Ҳар ҳолда масалан, биз ҳам бирорта ёш футболчини катта пулга сотиб олсак, шундай йўл тутамиз. Москва клуби ҳам ўзбекистонлик футболчи билан камида 5 йиллик шартнома имзоласа керак.

Жасурга Туркиянинг «Бешиктош» клубидан ҳам расмий таклиф бўлди. Шунингдек, таклиф бўлмаса-да, Бельгиянинг «Андерлехт» клубидан, Молдованинг етакчиларидан, Испания ва БАА клубларидан қизиқиш мавжуд. Аммо улар билан фақат оғзаки мурожаат бўлди, расмий таклифни эса «Локомотив» Москва ҳамда «Бешиктош»дан олдик. Жасурнинг ўзи «Локомотив» клубида тўп суришга қарор қилгани туфайли, унинг истакларини инобатга олган ҳолда ҳозирда Россия клуби билан музокаранинг якуний босқичини олиб бораяпмиз. Барчаси тез орада ҳал бўлади", — деди Улуғбек Мирзаев.