«Chelsi» bosh murabbiyi Frenk Lempard Angliya premyer-ligasining 38-turi doirasida bo‘lib o‘tgan «Vulverxemptonom»ga qarshi o‘yin (2:0) borasida o‘z fikrini bildirib o‘tdi.

«Bu juda yaxshi raqib, lekin bugun jamoamning intizomi fantastik darajada bo‘ldi. Ushbu mavsum davomida uydagi ba’zi o‘yinlarda bu qadar tartibli harakat qila olmagan edik.

Men uchun 4-o‘rin katta ahamiyatga ega, lekin «Chelsi» — kuchli to‘rtlikka kirganidan quvonadigan klub emas. Joriy mavsumda biz boshlang‘ich tarkibga ko‘p futbolchilarni jalb qildik, asosiy tarkibdagilarning esa o‘yinini kuchaytirdik.

Men kelganimda ko‘p savollar bor edi. Masalan, Eden Azarsiz oldinga harakat qila olamizmi yoki yo‘qmi? Top-o‘yinchini yo‘qotganimizni bilardik. Hozir esa biz haqiqiy jamoamiz va haqiqiy jamoaviy o‘yin namoyish etyapmiz. Ko‘ramiz, keyingi mavsumda qanday natija qayd etar ekanmiz», — dedi Lempard.

«Chelsi» APLning yakunlangan mavsumida 66 ochko bilan 4-o‘rinni egalladi va Chempionlar ligasi yo‘llanmasini qo‘lga kiritdi. Shuningdek, Lempard jamoasi Angliya kubogi finaliga chiqdi.