«Челси» бош мураббийи Фрэнк Лэмпард Англия премьер-лигасининг 38-тури доирасида бўлиб ўтган «Вулверхэмптоном»га қарши ўйин (2:0) борасида ўз фикрини билдириб ўтди.
«Бу жуда яхши рақиб, лекин бугун жамоамнинг интизоми фантастик даражада бўлди. Ушбу мавсум давомида уйдаги баъзи ўйинларда бу қадар тартибли ҳаракат қила олмаган эдик.
Мен учун 4-ўрин катта аҳамиятга эга, лекин «Челси» — кучли тўртликка кирганидан қувонадиган клуб эмас. Жорий мавсумда биз бошланғич таркибга кўп футболчиларни жалб қилдик, асосий таркибдагиларнинг эса ўйинини кучайтирдик.
Мен келганимда кўп саволлар бор эди. Масалан, Эден Азарсиз олдинга ҳаракат қила оламизми ёки йўқми? Топ-ўйинчини йўқотганимизни билардик. Ҳозир эса биз ҳақиқий жамоамиз ва ҳақиқий жамоавий ўйин намойиш этяпмиз. Кўрамиз, кейинги мавсумда қандай натижа қайд этар эканмиз», — деди Лэмпард.
«Челси» АПЛнинг якунланган мавсумида 66 очко билан 4-ўринни эгаллади ва Чемпионлар лигаси йўлланмасини қўлга киритди. Шунингдек, Лэмпард жамоаси Англия кубоги финалига чиқди.