Ispaniya chempionatida 2-o‘rinni olgan "Barselona" Yevropa chempionlar ligasi nimchorak final bahsiga yaxshi tayyorgarlik ko‘rganini namoyish etdi. Setyen shogirdlari "Napoli"ga qarshi javob bahsida to‘liq ustunlikka erishishdi.

Ayniqsa, birinchi bo‘limda kataloniyaliklar raqibga nisbatan tezroq harakat qilib, 3ta gol urishga muvaffaq bo‘lishdi. Uchrashuvning 10-daqiqasida burchakdan yetkazilgan uzatmani Lengle bosh bilan darvozaga joylab qo‘yib, faoliyatida YECHLdagi ilk golini urishga muvaffaq bo‘ldi.

Birinchi taym o‘rtasida Lionel Messi o‘ziga xos gol muallifiga aylandi. U uch himoyachini aldab o‘tib, yiqildi, o‘rnida turdi va yana yiqilayotib zarba berdi. To‘p Ospina qo‘riqlayotgan darvozaning olis burchagiga borib tushdi. Oradan ko‘p o‘tmasdan argentinalik futbolchi yana bir chiroyli gol muallifiga aylandi. Ammo VAR vaziyatni ko‘rib chiqqach, Leo to‘pni ko‘kragi bilan qabul qilgan paytda to‘p futbolchining qo‘liga tegib ketganini aniqladi va golni bekor qildi.

Birinchi bo‘lim so‘ngida Messi Kulibaliga nisbatan bosim uyushtirdi va undan to‘pni olib qo‘yish chog‘ida himoyachi Lionelning oyog‘idan tepib yubordi. Vaziyatga VAR aralashdi va penalti belgilandi. Bu paytda Messiga tibbiy yordam ko‘rsatilayotgani uchun penaltini Suares tepdi va hisobni 3:0 ko‘rinishiga keltirdi.

Birinchi bo‘limga qo‘shib berilgan 5 daqiqada "Barselona" darvozasi tomon penalti belgilandi. Insinye 11 metrli jarima zarbasidan unumli foydalanib, o‘yinga intrigani qaytardi.

Maydon egalari ikkinchi bo‘limda asosan hisobni ushlab qolish uchun o‘ynashdi va buning uddasidan chiqishdi. To‘g‘ri, bir vaziyatda Milik "Barsa" darvozasiga to‘pni yo‘llagan edi, ammo ofsayd tufayli gol inobatga olinmadi.

Shu tariqa, "Barselona" ikki o‘yin natijasiga ko‘ra (4:1) chorak final yo‘llanmasini qo‘lga kiritdi. Ushbu bosqichda Setyen jamoasiga "Bavariya" raqiblik qiladi. Mazkur o‘yin 14 avgust, juma kuni bo‘lib o‘tadi.

Yevropa chempionlar ligasi, 1/8 final, javob o‘yini
Barselona Ispaniya – Napoli Italiya 3:1 (3:1)
Gollar: 1:0 – 10 Langle, 2:0 – 23 Messi, 3:0 – 45, penalti Suares, 3:1 – 45, penalti InsinYE.
Barselona – ter Stegen, Alba, Langle, Pike, Serdji Roberto, de Yong, Rakitich, Semedu, Suares (Firpo, 90), Grizmann (Monchu, 84), Messi.
Napoli – Ospina, Mariu Ruy, Di Lorenso, Kulibali, Manolas, Demme (Lobotka, 46), Zelinski (Losano, 70), Kalyexon (Politano, 70), Fabian Ruis (Elmaz, 79), Insinye (Milik, 79), Mertens.
Ogohlantirishlar: Zelinski (60), Suares (90).
Dastlabki o‘yin: 1:1