Ispaniya terma jamoasi yarimhimoyachisi Pedro Rodriges Londonning "Chelsi" klubini tark etgani haqida xabar berdi.

"Besh yil... "Chelsi"dagi vaqtim tugadi. Men klub rahbariyati, jamoadoshlarim va muxlislardan minnatdorman. Klubda juda ko‘p quvonchli onlarni o‘tkazdim. "Chelsi"da o‘ynash men uchun sharaf edi", deb yozdi Pedro o‘zining instagramdagi sahifasida.

Yarimhimoyachining "Chelsi" bilan shartnomasi muddati tugadi, shuning uchun u boshqa klubga erkin agent sifatida o‘tadi. Katta ehtimol bilan futbolchining yangi klubi "Roma" bo‘ladi.

Ma’lumot uchun, 33 yoshli Pedro "Chelsi" safida 2015 yildan beri o‘ynab kelmoqda, klub uchun barcha musobaqalarda 206 ta o‘yinda maydonga tushib, 43 ta gol urgan va 28 ta golli uzatmani amalga oshirgan. U Ispaniya terma jamoasi safida 65 ta o‘yinda maydonga tushib, 17 ta gol urgan. Besh karra Ispaniya chempioni, Angliya chempioni, Ispaniya kubogining uch karra g‘olibi ("Barselona" safida), Angliya kubogi g‘olibi, Ispaniya superkubogining to‘rt karra g‘olibi, Chempionlar Ligasining uch karra g‘olibi, Yevropa Ligasi g‘olibi, UYEFA Superkubogining uch karra g‘olibi, klublar o‘rtasidagi jahon chempionati g‘olibi, jahon chempioni va Yevropa chempioni hisoblanadi.