«Paxtakor» 14 sentyabrdan Chempionlar Ligasi guruh bosqichida o‘yinlarni davom ettiradi.

Guruhimizdan o‘rin olgan ikki jamoa — "Al-Hilol" va "Shahr Xodro" klublari o‘z chempionatlarida mavsumni davom ettirishmoqda. Bir necha oylik tanaffusdan so‘ng Saudiya Arabistoni hamda Eron chempionatlari davom etib, mavsum yakuniga yaqinlashib kelishmoqda. "Al-Hilol" Saudiya Arabistoni chempionati tugashiga 6 tur qolganda ta’qibchisi "Nassr"ni 9 ochkoga ortda qoldirgan holda chempionlikka juda yaqinlashib qoldi. So‘nggi o‘yinda bu jamoa "Fateh"ni 2:1 hisobida mag‘lubiyatga uchratdi. Saudiyada chempionat 9 sentyabr kuni nihoyasiga yetishi mo‘ljallanmoqda.

"Shahr Hodro" jamoasi esa avvalgi turda "Istiqlol" bilan uchrashuvda 2:2 hisobida durang o‘ynadi. Mashhadliklar 28 bahsda 45 ochko to‘plab, mavsum tugashiga ikki tur qolganda  6-pog‘onadan o‘rin egallashgan.

BAAda esa 13 mart kuni o‘tkazilgan 19-tur bellashuvlaridan keyin futbol uchrashuvlari g‘oliblar e’lon qilinmagan holda to‘xtatib qo‘yilgan. Yangi mavsum 3 sentyabrda Liga Kubogi, 9 sentyabrda BAA chempionati bilan start olishi rejalashtirilgan. "Shabab Al Ahli" hozircha mart oyidan beri rasmiy o‘yinlarda maydonga tushgani yo‘q.