Coca Cola superligasining markazlashgan tarzda o‘tkazilishi kutilayotgan navbatdagi tur o‘yinlariga “Qo‘qon-1912” jamoasi a’zolari ham astoydil tayyorgarlik ko‘rishmoqda.

Baxtiyor Ashurmatov shogirdlari bugungi kunga qadar mashg‘ulotlarni Qo‘qon shahrida olib borishdi. O‘zbekiston milliy terma jamoasiga chaqirilgan futbolchilarimizda koronavirus infeksiyasi aniqlanganligi xaqidagi xabardan so‘ng ko‘plab muxlislarimiz futbolchilarning sog‘liklarini so‘rab murojaat qilishdi. Biz barcha muxlislarimizga jamoamiz a’zolarining salomatliklariga befarq bo‘lmaganlari uchun minnatdorchilik bildiramiz. Ayni kunlarda futbolchilarning barchalari sog‘-salomat.

“Qo‘qon-1912” jamoasi a’zolari PFL qoshida tashkil qilingan maxsus shifokorlar guruhining tavsiyalari asosida  Ig G    hamda PZR  testlarni topshirishdi. Bu tahlillarning natijalari futbolchi va murabbiylarimizning salomatliklari joyida ekanligini ma’lum qildi. Bu tekshiruvlar amalga oshirilgunga qadar jamoa a’zolari bir muddat mashg‘ulotlarda qatnashmay turishdi. Hozirgi kunga kelib barchasi yaxshi, mashg‘ulotlar kuniga ikki mahaldan olib borilmoqda. Birgina Murod Xolmuhammedov hozircha Qo‘qon shahriga yetib kelgani yo‘q.

Bugun kunning ikkinchi yarmida Baxtiyor Ashurmatov boshchiligidagi “Qo‘qon-1912” jamoasi Toshkent shahriga jo‘nab ketishadi. Ertadan mashg‘ulotlar Toshkentda davom ettiriladi. Jamoamiz sardori Murod Xolmuhammedov ham Toshkentdagi yig‘in davomida jamoa safiga qo‘shilishi kutilmoqda.