Mazkur qarama-qarshilik tarixida hozirga qadar 18 uchrashuv o‘tkazilgan.

AGMK "Andijon"ga qarshi o‘yinlarda 10 marotaba zafar quchgan. Yubiley 10-g‘alabaga o‘tgan mavsum Andijonda o‘tgan birinchi davra doirasidagi bahsda erishilgandi. "Andijon" esa jamoamiz ustidan 4 bor g‘alaba nashidasini surishga muvaffaq bo‘lgan. Mazkur g‘alabalarga "Andijon" jamoasi 2008, 2009, 2010 va 2011 yillardagi o‘z uyida kechgan bellashuvlarda erishgan. Ya’ni, AGMK Olmaliqda "Andijon"ga hech bo‘yin egmagan. Ushbu jamoalar o‘rtasidagi qolgan 4 uchrashuvda esa durang natijasi qayd etilgan. Mazkur murosa yo‘liga kelingan 3 bellashuvdan ikkitasi (2014, 2016) Olmaliqdagi bahsda sodir bo‘lgan. Andijonda esa jamoalar bir marotaba, ya’ni 2014 yilgi mavsumda durang qayd etishgan. Qizig‘i, 2014 yilgi mavsumdagi har ikkala bahsda ham g‘olib nomi aniqlanmagan.

Shu tariqa mazkur qarama-qarshilikdagi sezilarli ustunlik jamoamiz tarafida. To‘plar nisbati bo‘yicha ham ko‘rsatkich tabiiyki AGMK foydasiga xizmat qilmoqda: 32-22.

Mazkur o‘yinga jamoalar ikki xil kayfiyatda kelishmoqda. Mirjalol Qosimov boshqaruvidagi AGMK hozircha mag‘lubiyat nimaligini bilmay, jadvalda peshqadam “Paxtakor”dan 1 ochkoga kam to‘plagan holda yuqori kayfiyatda. Ikkinchi restartni ham jamoamiz ko‘tarinki ruhda boshlagani va jamoadagi a’lo kayfiyat bo‘lajak uchrashuv oldidan jamoaga qo‘shimcha ishonch berishi shubhasiz.

“Andijon” esa hanuzgacha g‘alaba ta’mini sezmagan va jamoa jadvalda autsayder maqomida elitada qolish uchun kurashmoqda.  Bu jihat raqibga nisbatan jiddiy yondashishga undaydi.

AGMK - "Andijon" uchrashuvi qiziqarli kechishiga bir qancha omillar mavjud. Birinchi navbatda har ikkala jamoaga ham ochko suv va havodek zarur. AGMK yuqori o‘rinlardagi kurashini davom ettirishi va “Andijon” uzoq davom etayotgan seriyaga chek qo‘yishga harakat qilishi tabiiy.

Mazkur o‘yinda jamoamiz ko‘k rangli libosda harakat qiladi. "Andijon" esa oq libosda maydonga tushadi.

Eslatib o‘tamiz, Superliganing markazlashtirib o‘tkazilayotgan "Andijon" — AGMK uchrashuvi 21 avgust kuni Toshkentdagi TTMYI stadionida soat 17:00da boshlanadi.

Bo‘lajak uchrashuvni boshqarish Ilgiz Tantashev boshchiligidagi hakamlar guruhiga ishonib topshirildi. Mazkur tayinlov Ilgiz Tantashev uchun jamoamiz ishtirokidagi 22-o‘yinga aylanadi. Ilgiz Tantashev boshqargan o‘yinlarda AGMK 8 g‘alaba, 8 durang va 5 mag‘lubiyat qayd etgan.

Superliga, 11-tur.
21 avgust, juma
«Andijon» — AGMK
Hakamlar: Ilgiz Tantashev, Timur Galeev, Baxtiyorxo‘ja Shavkatov, Adhamjon Ergashev
Nazoratchi: Aleksandr Popov
Komissar: Muhammad Sodiq Sodiq-Oxunov