Мазкур қарама-қаршилик тарихида ҳозирга қадар 18 учрашув ўтказилган.

АГМК "Андижон"га қарши ўйинларда 10 маротаба зафар қучган. Юбилей 10-ғалабага ўтган мавсум Андижонда ўтган биринчи давра доирасидаги баҳсда эришилганди. "Андижон" эса жамоамиз устидан 4 бор ғалаба нашидасини суришга муваффақ бўлган. Мазкур ғалабаларга "Андижон" жамоаси 2008, 2009, 2010 ва 2011 йиллардаги ўз уйида кечган беллашувларда эришган. Яъни, АГМК Олмалиқда "Андижон"га ҳеч бўйин эгмаган. Ушбу жамоалар ўртасидаги қолган 4 учрашувда эса дуранг натижаси қайд этилган. Мазкур муроса йўлига келинган 3 беллашувдан иккитаси (2014, 2016) Олмалиқдаги баҳсда содир бўлган. Андижонда эса жамоалар бир маротаба, яъни 2014 йилги мавсумда дуранг қайд этишган. Қизиғи, 2014 йилги мавсумдаги ҳар иккала баҳсда ҳам ғолиб номи аниқланмаган.

Шу тариқа мазкур қарама-қаршиликдаги сезиларли устунлик жамоамиз тарафида. Тўплар нисбати бўйича ҳам кўрсаткич табиийки АГМК фойдасига хизмат қилмоқда: 32-22.

Мазкур ўйинга жамоалар икки хил кайфиятда келишмоқда. Миржалол Қосимов бошқарувидаги АГМК ҳозирча мағлубият нималигини билмай, жадвалда пешқадам “Пахтакор”дан 1 очкога кам тўплаган ҳолда юқори кайфиятда. Иккинчи рестартни ҳам жамоамиз кўтаринки руҳда бошлагани ва жамоадаги аъло кайфият бўлажак учрашув олдидан жамоага қўшимча ишонч бериши шубҳасиз.

“Андижон” эса ҳанузгача ғалаба таъмини сезмаган ва жамоа жадвалда аутсайдер мақомида элитада қолиш учун курашмоқда.  Бу жиҳат рақибга нисбатан жиддий ёндашишга ундайди.

АГМК - "Андижон" учрашуви қизиқарли кечишига бир қанча омиллар мавжуд. Биринчи навбатда ҳар иккала жамоага ҳам очко сув ва ҳаводек зарур. АГМК юқори ўринлардаги курашини давом эттириши ва “Андижон” узоқ давом этаётган серияга чек қўйишга ҳаракат қилиши табиий.

Мазкур ўйинда жамоамиз кўк рангли либосда ҳаракат қилади. "Андижон" эса оқ либосда майдонга тушади.

Эслатиб ўтамиз, Суперлиганинг марказлаштириб ўтказилаётган "Андижон" — АГМК учрашуви 21 август куни Тошкентдаги ТТМЙИ стадионида соат 17:00да бошланади.

Бўлажак учрашувни бошқариш Ильгиз Танташев бошчилигидаги ҳакамлар гуруҳига ишониб топширилди. Мазкур тайинлов Ильгиз Танташев учун жамоамиз иштирокидаги 22-ўйинга айланади. Ильгиз Танташев бошқарган ўйинларда АГМК 8 ғалаба, 8 дуранг ва 5 мағлубият қайд этган.

Суперлига, 11-тур.
21 август, жума
«Андижон» — АГМК
Ҳакамлар: Илгиз Танташев, Тимур Галеев, Бахтиёрхўжа Шавкатов, Адҳамжон Эргашев
Назоратчи: Александр Попов
Комиссар: Муҳаммад Содиқ Содиқ-Охунов