"Bavariya" Yevropa chempionlar ligasining joriy mavsumida rekord miqdorda daromad oladigan bo‘ldi.

Myunxenliklar bir mavsumda pul topish bo‘yicha "Barselona"ga tegishli rekordni yangilashga yaqin turishibdi.

"Kicker" tarqatgan xabarga ko‘ra, "Bavariya" ushbu mavsumda 120 million yevrodan ortiq daromad oladi. "Barselona" 2019 yilda 117,73 million yevro ishlab topgan edi.

Joriy mavsumda UYEFA quyidagi tartibda pul to‘lab beradi:

Guruh bosqichiga chiqqanlik uchun: 15,25 million yevro;

Guruh bosqichida: g‘alaba uchun 2,7 mln ​​evro (6ta g‘alaba uchun — 16,2 mln yevro);

Nimchorak finalga chiqqani uchun: 9,5 mln yevro;

Chorak finalga chiqqani uchun: 10,5 mln yevro;

Yarim finalga chiqqani uchun: 12 mln yevro;

Finalga chiqqani uchun: 15 mln yevro;

Chempionlar ligasida g‘oliblik uchun: 4 mln yevro + UEFA superkubogidagi ishtirok uchun 3,5 mln yevro.

Bundan tashqari, "Bavariya" musobaqaning so‘nggi 10 yillikdagi reytingida 3-o‘rinni egallab turgani uchun qo‘shimcha 33,24 mln yevro oladi. Shuningdek, klub teletranslyasiyalar huquqidan 11,5 mln yevro ishlab topadi.

Shu tariqa, "Bavariya"ning Chempionlar ligasi orqali ishlab topgan pullari hozirdanoq 123 million yevroga yetdi. Jamoa bosh sovrinni qo‘lga kiritsa, daromad miqdori 130 million yevrodan oshadi.