O‘zbekiston futbol assotsiatsiyasi tomonidan mamlakatimizda hakamlik sohasini rivojlantirish, futbol hakamlari malaka va salohiyatini oshirish, halollik va shaffoflikni ta’minlashga qaratilgan tizimli ishlar muntazam ravishda amalga oshirib kelinmoqda.

Jumladan, ushbu mavsum davomida O‘zbekiston Superligasi va Pro-ligada tur o‘yinlari yakunlangach O‘FA Hakamlar va nazoratchilar boshqarmasi tomonidan hakamlar uchun maxsus seminar tashkil etilib, yo‘l qo‘yilgan xato va kamchiliklar tahlil qilinmoqda.

Bugun «Chig‘atoy» sport bazasida O‘zbekiston Superligasi o‘tgan tur uchrashuvlari yakunlariga bag‘ishlangan seminar tashkil qilindi. Unda FIFA instruktorlari, hakamlar, nazoratchilar ishtirok etdi.

Seminar davomida o‘tgan turlardagi hakamlarning xatti-harakatlari videomateriallar asosida tahlil qilindi. Yo‘l qo‘yilgan xatolar ko‘rsatib o‘tildi, kamchiliklarni qanday bartaraf etish, keyingi o‘yinlarda bu xatolarni takrorlamaslik uchun nimalarga ahamiyat qaratish zarurligi ta’kidlandi. O‘tgan tur bahslarida qo‘pol xatoga yo‘l qo‘ygan hakamlarga intizomiy choralar ko‘rildi.

Bu kabi tahliliy seminarlar mavsum davomida o‘tkazib boriladi.