Ushbu ruknimizdagi eng so‘nggi yangiliklar bilan tanishtirishda davom etamiz.
Auar qimmatlashmoqda
“Lion” klub yarim himoyachisi Ussama Auar borasida bir qarorga keldi.
“L’equipe”ning ma’lum qilishicha, “taqachilar” o‘z futbolchisining transfer qiymatini 40 milliondan 60 millionga qadar ko‘tarib qo‘yganini rasman e’lon qildi.
Manbaning ma’lum qilishicha, ushbu narx “Yuventus” jamoasini to‘liq qanoatlantiradi va Turin klubi yarim himoyachi uchun asosiy fovorit bo‘lib turibdi.
Sokratis Italiyada?!
Italiyaning “Napoli” klubi Londonning “Arsenal” jamoasi himoyachisi Sokratis Papastatopulos bilan shartnoma imzolashga juda yaqin turibdi.
Bu haqida bir nechta Italiya nashrlari ma’lum qilmoqda.
Manbaning ma’lum qilishicha, “Napoli” grek futbolchisi bilan shaxsiy shartnoma borasida kelishuvga erishgan.
Eslatib o‘tamiz, himoyachi allaqachon klub bilan o‘rtadagi bir yillik shartnomani bekor qilish borasida muzokaralar olib bormoqda.
PSJ “tulkilar”ni “boy” qilmoqchi
Parijning PSJ jamoasi “Lester” klubi himoyachisi Chaglar Suyunju bilan qiziqib qoldi.
Turkiyaning “Ajanasspor” nashrining ma’lum qilishicha, Parij klubi YECHLdan so‘ng klubni tark etishi aniq bo‘lib ulgurgan Tiago Silvaning o‘rnini aynan turk futbolchisi bilan to‘ldirmoqchi.
Manbaning ma’lum qilishicha, PSJ Chaglarni qo‘lga kiritish uchun “Lester”ga 60 million yevro taklif qilmoqchi.
Klub kelasi haftadan boshlab ushbu transfer borasidagi muzokaralarga start beradi.
“Arsenal” 10 ta futbolchini transferga qo‘yadi
Londonning “Arsenal” jamoasi tez orada bir yo‘la 10 ta futbolchini transferga qo‘yadi.
“The Times”ning ma’lum qilishicha, jamoa Arteta tomonidan qayta shakillantirishi munosabati bilan «Arsenal» Xolding, Chembers, Sokratis, Mustafilarni sotib yuboradi. Bundan tashqari, Meytlend-Neyilz va Matteo Genduzi ham ushbu ro‘yxatdan o‘rin egallagan. Shuningdek, jamoani yana 3 ta futbolchi tark etishga da’vogar bo‘lib turibdi. Hozircha, qolgan futbolchilarning nomi ma’lum emas.
Manbaning ma’lum qilishicha, jamoa shu yo‘sinda futbolchilarning maoshidan tejab qolishni va kelasi mavsumda yoshartirilgan “Arsenal” bilan ishtirok etishni oldiga maqsad qilib qo‘ygan.
Traore ketsa…
Angliyaning “Vulverhempton” klubi agar jamoani yozda Adama Traore tark etsa, uning o‘rnini Lukas Okampos bilan to‘ldirmoqchi.
“Bo‘rilar” o‘z vingerini 70 million funtdan kamiga sotmoqchi emas. Agar ispaniyalik futbolchiga da’vogar paydo bo‘lsa, “Vulverhempton” o‘ylab o‘tirmasdan muzokaralarga kirishadi.
“Daily Star”ning ma’lum qilishicha, jamoa Okamposni 35 million yevro evaziga o‘z safiga qo‘shib olishni reja qilmoqda.
