Superliganing 14-turi doirasida bo‘lib o‘tgan "Andijon" va "Lokomotiv" jamoalari o‘rtasidagi uchrashuvdan so‘ng matbuot anjumanida dastlab mezbonlar bosh murabbiyi Baxtiyor Hamidullayev ishtirok etdi.

— Jismoniy tayyorgarlik umuman yo‘q, 60-70 daqiqalarda futbolchilarimiz charchab qolishmoqda, shuning uchun bir kishi ko‘p bo‘lib o‘ynasak ham jismoniy tarafdan qiynalib qoldik.

— Farhod Bekmurodov jamoa sardori edi, lekin bugungi o‘yinda Abdulloh Olimov sardor sifatida harakat qildi, nega bunday bo‘ldi?
— Biz jamoa a’zolari bilan so‘rovnoma o‘tkazdik. Birinchi o‘rinda Zozulya nomzodi ilgari surildi, ikkinchi o‘rinda esa Abdulloh Olimov, 3-4 o‘rinlarni Qaxramon Baxodirov va Farxod Bekmurodov egalladi. Shu sababli bugun Abdulloh Olimov sardor sifatida maydonga tushdi.

— Futbolchilarimiz mashg‘ulotlardan tashqari o‘zlari alohida mashg‘ulotlar olib borishyaptimi?
— Hozir vaqt juda kam, futbolchilarimiz ulgirmay qolishmoqda, har 5kunda o‘yin bo‘lmoqda

— Bilamiz, siz hujumchi bo‘lgansiz, mashg‘ulotlardan tashqari hujumchilar bilan alohida ishlayapsizmi?
— Bu endi boshlanishi, birinchi navbatda himoyaga e’tibor qaratyapmiz, menimcha bugun himoyachilarimiz yomon o‘ynamadi. Himoyadagi muammolarimiz deyarli hal bo‘lmoqda, keyin esa yarim himoya va hujumga e’tibor qaratamiz.

— Nega bugun Xushnud Avilov himoya markazida o‘ynadi?
— To‘g‘risi markaziy himoyachi Emmanuel Arivachukvuga ishonchim yo‘q, mendan oldin Xushnudni markaziy himoyachi sifatida tayyorlashayotgan ekan, menimcha bugun Xushnud yaxshi o‘ynadi

— Zozulya jamoaga qaytadimi?
— Qaytadi. Uning masalasi shu kunlarda xal bo‘ladi

«Andijon» matbuot xizmati.