Суперлиганинг 14-тури доирасида бўлиб ўтган "Андижон" ва "Локомотив" жамоалари ўртасидаги учрашувдан сўнг матбуот анжуманида дастлаб мезбонлар бош мураббийи Бахтиёр Ҳамидуллаев иштирок этди.

— Жисмоний тайёргарлик умуман йўқ, 60-70 дақиқаларда футболчиларимиз чарчаб қолишмоқда, шунинг учун бир киши кўп бўлиб ўйнасак ҳам жисмоний тарафдан қийналиб қолдик.

— Фарҳод Бекмуродов жамоа сардори эди, лекин бугунги ўйинда Абдуллоҳ Олимов сардор сифатида ҳаракат қилди, нега бундай бўлди?
— Биз жамоа аъзолари билан сўровнома ўтказдик. Биринчи ўринда Зозуля номзоди илгари сурилди, иккинчи ўринда эса Абдуллоҳ Олимов, 3-4 ўринларни Қахрамон Баходиров ва Фарход Бекмуродов эгаллади. Шу сабабли бугун Абдуллоҳ Олимов сардор сифатида майдонга тушди.

— Футболчиларимиз машғулотлардан ташқари ўзлари алоҳида машғулотлар олиб боришяптими?
— Ҳозир вақт жуда кам, футболчиларимиз улгирмай қолишмоқда, ҳар 5кунда ўйин бўлмоқда

— Биламиз, сиз ҳужумчи бўлгансиз, машғулотлардан ташқари ҳужумчилар билан алоҳида ишлаяпсизми?
— Бу энди бошланиши, биринчи навбатда ҳимояга эътибор қаратяпмиз, менимча бугун ҳимоячиларимиз ёмон ўйнамади. Ҳимоядаги муаммоларимиз деярли ҳал бўлмоқда, кейин эса ярим ҳимоя ва ҳужумга эътибор қаратамиз.

— Нега бугун Хушнуд Авилов ҳимоя марказида ўйнади?
— Тўғриси марказий ҳимоячи Эммануэл Аривачуквуга ишончим йўқ, мендан олдин Хушнудни марказий ҳимоячи сифатида тайёрлашаётган экан, менимча бугун Хушнуд яхши ўйнади

— Зозуля жамоага қайтадими?
— Қайтади. Унинг масаласи шу кунларда хал бўлади

«Андижон» матбуот хизмати.