AGMK bosh murabbiyi Mirjalol Qosimov O‘zbekiston chempionatining 15-turi doirasida bo‘lib o‘tgan "So‘g‘diyona"ga qarshi o‘yindan so‘ng o‘z fikrini bildirib o‘tdi.

"Jangovar va qiziqarli o‘yin guvohiga aylandik. Birinchi davrada Jizzaxda o‘tgan uchrashuvda dastlab o‘z darvozamizdan to‘p olib chiqqandik. Qolaversa, Yovan Jokich ikkita sariq kartochka olib maydondan chetlatilgan edi. Bu safar Dilshod Jo‘rayev shunday vaziyatga tushib qoldi.

Lekin, umuman olganda, o‘yindan taassurotlar yomon emas. Faqat natija yo‘q. Birinchi bo‘limda ham golli vaziyatlardan foydalana olmadik. Undan ham yaxshiroq o‘ynashimiz kerak edi. O‘ylashimcha, ikki jamoa haqli ravishda bir ochkodan qo‘lga kiritdi. Bizni qo‘llab-quvvatlab turgan muxlislarga minnatdorchilik bildirmoqchiman. Futbolchilarim bir kishi kamligiga qaramasdan hisobda ortda borayotib qo‘lni tushirishmadi. Yakunda standart vaziyatdan gol urdik.

Shu fursatdan foydalanib, bugun meni tabriklagan ko‘plab tanishlar, befarq bo‘lmagan insonlar, turli saytlar, OAVlar va muxlislarga o‘zimni minnatdorchiligimni bildiraman. Ularga javob yozishga vaqtim bo‘lmadi. Hali telefonimni ochib qarashga ham vaqt bo‘lmadi. Hammaga rahmat", — dedi Qosimov.