Bugun O‘zbekiston Superligasining 16-turida "Bunyodkor" o‘z maydonida AGMKni qabul qiladi. Bu o‘yin nafaqat jamoalar balki, murabbiylar to‘qnashuvi hamdir.
Olmaliqliklar matbuot xizmati xabar berishicha, AGMKni Mirjalol Qosimov, "Bunyodkor"ni esa Vadim Abramov boshqarayotgandan buyon ushbu jamoalar uchun bo‘lajak o‘yin hisob bo‘yicha oltinchi bahsga aylanadi. O‘tgan yili har uchala frontda duch kelgan AGMK va "Bunyodkor" bellashuvlarida chempionat doirasida "Bunyodkor" Olmaliqda g‘alaba qozongan bo‘lsa, Toshkentdagi o‘yinda AGMK "qaldirg‘ochlar"ga imkoniyat qoldirmay mag‘lub etgandi. Shuningdek, Liga Kubogi va O‘zbekiston Kubogi doirasidagi uchrashuvlarda AGMK yaqqol ustunlik bilan g‘alabani tantana qilgandi. Joriy mavsum esa birinchi davrada Qosimov shogirdlari “qaldirg‘ochlar”ni ishonchli tarzda mag‘lub etishgandi.
