Bugun UYEFA superkubogi sovrini uchun uchrashuv bo‘lib o‘tadi. U haqidagi barcha ma’lumotlar bilan tanishtirib o‘tamiz.
Qachon va qayerda?
UYEFA superkubogi 24 sentyabr, payshanba kuni Budapesht shahridagi "Pushkash Arena" stadionida bo‘lib o‘tadi. Unda Yevropa ligasi g‘olibi "Sevilya" va Chempionlar ligasi g‘olibi "Bavariya" klublari to‘qnash kelishadi. Uchrashuv Toshkent vaqti bilan 00:00da boshlanadi.
Avvalgi yillarda UYEFA superkubogi Praga (2013), Kardiff (2014), Tbilisi (2015), Tronxeym (2016), Skopye (2017), Tallin (2018) va Istanbul (2019) shaharlarida o‘tkazilgan. Ungacha esa uchrashuv doimiy ravishda Monakoda tashkil etilgan.
2020 yilgi bahs dastlab 12 avgust kuni Portu shahridagi "Dragau" stadionida o‘tkazilishi kerak edi. Ammo COVID-19 pandemiyasi tufayli o‘yin Budapeshtga ko‘chirildi.
UYEFA superkubogi nima?
Ikkita yevrokuboklarning g‘oliblari o‘rtasida o‘yin tashkil qilish g‘oyasi niderlandiyalik jurnalist Anton Vitkampga tegishli. Chempionlar kubogi/CHempionlar ligasi g‘olibi doimo unda ishtirok etib kelgan. Ikkinchi ishtirokchi sifatida turli yillarda yo Kubok egalari kubogi (1972-1999), yoki UYEFA kubogi/Evropa ligasi (2000-...) g‘olibi tanlangan.
Kim ko‘p g‘olib chiqqan?
2019 yilda UYEFA superkubogini "Liverpul" qo‘lga kiritgan. Ammo YECHL g‘olibi hamisha ham Superkubokda g‘alaba qozonavermagan. Shu paytgacha Superkubok uchun o‘tkazilgan 44ta bahsning 24tasidagina Chempionlar kubogi/CHempionlar ligasi sohibi g‘alaba qozongan. "Barselona" va "Milan" klublari UYEFA superkubogini qo‘lga kiritish bo‘yicha rekordchi hisoblanishadi — 5 martadan.
Keyingi UYEFA superkubogi uchun bahslar qayerda o‘tkaziladi?
Keyingi 3 yilda UYEFA superkubogi uchun uchrashuv quyidagi shaharlarda o‘tkazilishi rejalashtirilgan: Belfast (2021), Xelsinki (2022) va Qozon (2023).
Taxminiy tarkiblar
"Bavariya": Noyer; Ernandes, Boateng, Alaba, Devis; Goreska, Kimmix; Sane, Myuller, Gnabri; Levandovski
"Sevilya": Bunu; Navas, Kunde, Diyego Karlos, Eskudero; Rakitich, Fernando, Xordan; Suso, En-Nesiri, Okampos
