Superliga 17-turidan o‘rin olgan yana bir o‘yin Andijonda bo‘lib o‘tdi. Unda musobaqa autsayderlari «Andijon» va «Buxoro» o‘zaro kuch sinashdi.

Dastlab mehmonlar 30-daqiqada Izzat Abdullayevning golidan keyin oldinga o‘tib oldi. Bunga maydon egalari besh daqiqa o‘tib, Abdullo Olimovning goli bilan javob qaytardi.

Birinchi bo‘lim oxirlab borayotgan bir vaqtda buxoroliklar futbolchisi Ilhom Alijonov ikkinchi sariq kartochkasini olib maydonni tark etdi. Ikkinchi bo‘limda andijonliklar ustunlikka ega bo‘ldi. 52-daqiqada Baxtiyor Qosimov «Andijon»ga g‘alaba keltirgan golga muallif bo‘ldi. Hisob yanada yiriklashishi mumkin edi, biroq mezbonlar 85-daqiqada penaltidan unumli foydalana olmadi.

Shu tariqa «Andijon» 2020 yilgi mavsumdagi ilk g‘alabasini qo‘lga kiritdi va ochkolarini 10 taga yetkazib olgan holda 12-o‘ringa ko‘tarildi. «Buxoro» (8) esa so‘nggi pog‘onaga ravona bo‘ldi.

Coca-Cola Superliga, 17-tur
«Andijon» — «Buxoro» 2:1
Gollar: 0:1 – 30 Izzatilla Abdullayev, 1:1 – 35 Abdullo Olimov, 2:1 – 52 Baxtiyorjon Qosimov.
Chetlatish: Alijonov (41).