Transfer olamidagi eng so‘nggi yangiliklar bilan tanishtirishda davom etamiz.
Kyeza «Yuve»da!
Italiyaning «Fiorentina» jamoasi hujumchisi Federiko Kyeza faoliyatini «Yuventus»da davom ettiradi.
«Sky Italia» nashrining ma’lum qilishicha, ayni damda hujumchi Turin klubida tibbiy ko‘rikdan o‘tmoqda.
Manbaning ma’lum qilishicha, tomonlar futbolchining transfer summasi borasida kelishuvga erishgan. Bundan tashqari, shaxsiy shartnoma borasida futbolchi bilan ham kelishuv hal etilgan.
Ma’lumotlarga qaraganda, bugun tunda «Yuventus» Federikoning transferini rasman e’lon qiladi.
«Liverpul» futbolchisi «Verder»da?!
Transfer huquqi «Liverpul»ga tegishli bo‘lgan Marko Gruich faoliyatini Bundesligada davom ettiradi.
Goal nashrining ma’lum qilishicha, 24 yoshli futbolchi bilan «Verder» shaxsiy shartnoma borasida kelishuvga erishgan.
Manbaning ma’lum qilishicha, futbolchining o‘zi APLga qaytmoqchi emas.
Eslatib o‘tamiz, Marko bilan shuningdek Italiyaning bir nechta klublari ham qiziqib qolgan edi.
Ryudiger «Milan»da?!
Londonning «Chelsi» klubi markaziy himoyachisi Antonio Ryudiger faoliyatini «Milan»da davom ettirishga rozi bo‘ldi.
«Tuttosport» nashrining ma’lum qilishicha, himoyachi o‘yin amaliyotisiz qolib ketmoqchi emas. U mavsum so‘nggida bo‘lib o‘tishi kutilayotgan Yevropa chempionatida to‘p surishni reja qilgan.
Manbaning ma’lum qilishicha, «Milan» himoyachini bir mavsumga ijaraga olmoqchi.
Barreka «Fiorentina»ga o‘tadi
«Monako» klubi markaziy himoyachisi Antonio Barreka tez orada «Fiorentina» a’zosiga aylanadi.
«Tuttosport» nashrining ma’lum qilishicha, bugun futbolchi Italiyaga uchib keldi va tez orada tibbiy ko‘rikdan o‘tadi.
Manbaning ma’lum qilishicha, «Binafshalar» himoyachini bir mavsumga ijaraga olmoqda. Shunindek, ularda mavsum so‘nggida Barrekani 5 million yevro evaziga to‘liq sotib olish imkoniyati mavjud.
Bugun «Qizil iblislar» avjida
Angliyaning «Manchester Yunayted» jamoasi transfer oynasining so‘nggi kunidagi rejalarini oshkor qildi.
«The Sun» nashrining ma’lum qilishicha, «qizil iblislar» jamoa nishonida «Portu» himoyachisi Aleks Tellas va erkin agent maqomidagi Edinson Kavanilar mavjud.
Manbaning ma’lum qilishicha, jamoa Usman Dembeleni ijaraga olishga yana bir bor urunib ko‘radi.
